السلام عليكم
راح اتكلم عن البشرة الحساسة (الوجه) , كيف نهتم فيها , كيف نتفادى حدوث الهيجان واذا صار فيه هيجان كيف نخفف منه
اول حاجه بشرتي حساسه فعشان كدا كتبت الموضوع دا لانه من خبرتي ومن المستحضرات العنايه بالبشره الكثيره الي جربتها
اقدر افيدكم , كمان نوعيه بشرتي مختلطه حساسه ...
كيف نعرف انه بشرتنا حساسه , يكون في احمرار من عند الانف الين نصف الخد وع الذقن والجبهه يكون احمرار خفيف
لكن مبين واضح عند الانف ونصف الخد , لمن نستعمل اي مستحضر سواء غسول ولا مقشر وكريم ويكون معطر وتهيج البشره وتحسي بحرقان هنا تعرفي انه بشرتك حساسه ولازم مستحضراتك تكون طبيه خاليه من العطور ...
كيف نهتم ببشرتنا الحساسه
اول حاجه الغسول ( لازم طبي وخالي من العطور ) وهنا حطيت لكم كذا مثال قد جربتهم من قبل وناسبوني
كمان ممكن هالغسولات ماتسخدموهم بشكل يومي لانه تنظيفهم مايكون عميق لكن يفضل استخدامهم من فتره لفتره او لمن يصير في هيجان البشره او لمن يكون الاحمرار بزياده عن العاده ...
تاني حاجه التونر ( التونر مهم جدا لكن لاتستخدموه بعد الغسول يفضل استخدامه بدل غسول عشان مايصير اي هيجان للبشره , الافضل استخدام تونر بعد الغسول( يكون ماء ورد لانه طبيعي ومافيه مواد حافظه ويسكر المسامات ويمنع الشعور بأي هيجان) ...
الكريم المرطب ( لآزم يكون خالي من العطور شي جدا مهم وينحط بطريقه طبطبه لانه وضع الكريم بقوه ع البشره وبطريقه المسح البشره راح تحمر بزياده , فيفضل وضع الكريم بطريقه طبطبه وعمل مساج خفيف جدا للبشره
مزيلات المكياج ( ممكن استخدام المناديل المخصصه لي ازاله المكياج للبشره الحساسه لكن مسح المكياج بكل هدوء , يعني لاتتحمسوا وانتوا تشيلوا المكياج لانه ممكن يحصل هيجان للبشره والشي دا صعب انه يخف بسهوله , كمان منطقه العيون يفضل استخدام مزيل طبي او ممكن يكون فيه نسبه زيت ومزيل بحيث انه ماينشف المنطقه ومايحرقها (منطقه تحت العين)
المقشرات ( لمن نغسل بشرتنا قبل المقشر بمويه مايله للدفئ اشويه ماتكون تلسع , وبعدها نستخدم المقشر بحركات دائريه ناعمه ومانقشر بقوه عشان مانؤذي البشره , بعدها نغسل بمويه بارده عشان نقفل المسام وفي انواع مقشرات مخصصه للبشره الحساسه وتكون ناعمه بحيث انها تفيد من غير ماتضر ....
الماسك ( يفضل الماسكات الطبيعيه زي العسل , الزبادي , الافكادو , او ممكن الماسكات الجاهزه الطبيه تحصلوها بالصيدليات )
الفرش لتنظيف الوجه ( في فرش مخصصه للبشره الحساسه زي كلارسونك وكلينك اما بالنسبه للفرش زي ذا بودي شوب وغيرها فيفضل استخدمها برفق على البشره بحيث انه بس تطلع اثار الفاونديشن و لاتستخدم يوميا)...
بخاخ افين للبشره الحساسه
استخدمه لمن بشرتي تهيج بعد استخدام الغسول وبعد مسح الوجه من المكياج لانه يخفف الهيجان بشكل ملحوظ , كمان بعد الرياضه البشره يتغير لونها للون الاحمر وقتها اغسل بشرتي بمويه مايله للبروده وامسحها بمنشفه نظيفه بحركات طبطبه خفيفه وابخ بخاخ افين
واقي الشمس
اهم شي للبشره الحساسه ولازم تكون نسبه وقايه من الشمس 50 لانه البشره معرضه لي اشعه الشمس الحاره فا ممكن تعمل احمرار وحرقان في البشره فا واقي الشمس راح يحمي البشره من اي تحسس
المكياج
حتكلم عن الاساس والبيبي كريم يفضل يكون طبي لانه في انواع يكون فيها نسبة عطور , فلمن تختاري اختاري نوع طبي ...
اشياء تبتعدي عنها
الليمون ممكن يسبب حرقان للبشره , كريمات معطره زي الي موجوده في السوبر ماركت , غسولات معطره , مقشرات الطبيعيه الي فيها سكر او ملح
اشياء راح تفيدك
شرب المويه بكثره لانه راح يرطب البشره ويمنع اي حبوب او اثار احمرار وممكن المويه مع الليمون مفيده كتير وراح تلاحظوا فرق , غسل الوجه بمويه شرب لانها تكون خاليه من اي املاح تضر البشره .....
ودمتم بوود
ليست هناك تعليقات :
إرسال تعليق