مرحبا
مدونه اليوم راح اتكلم عن منتجات كنت بستخدمها خلال شهر مايو
في منها حبيتها وراح رجع اشتري منها وفي منها حبيتها لكن كمانا حابه اجرب شي تاني
حبلش بالميك اب
ماسكارا من برجوا (الجديده)
اخدت ضجه كبيره لمن نزلت انها واااااو وحلوه وتطول وتكثف واتنين في واحد وفيها فرشتين
وسوادها جميل ... طيب نيجي لرائي
اول حاجه تكثف وسوادها حلوو وتقوس الرموش تخليها مقوسه ومرفوعه
وتوسع العين وفرشتها جميله بالزات الي تكثف فرشتها صغيره وحلووه
لكن تطول لاء , تنمسح بسرعه وقت ازاله الميك اب لاء
يعني لو تبغي شي يطول الرموش ماتديكي داك الطول الي يكون واضح وكمانا تتكتل
لمن تحطي اكتر من طبقه وتنشف بسرعا , حبيتها انه تقوس الرموش وتكبر العين هذا اكتر شي عجبني فيها
سعرها اخدتها بالتخفيض 66 ريال لكن سعرها اصلن 83 ريال من سنتربوينت
ماراح ارجع اشتريها تاني لاني حابه اجرب ماسكارات تانيه من براند تاني
ماسكارا من ريميل للحواجب
في منها لونين شفافه ولون بني غامق , حواجبي لونها اسود فحبيت اخود الشفافه لاني مااحتاج غير تثبيت
ثباتها بصراحه مو مرا يعني لمن احطها على حواجبي من الساعه 7 ونص الصباح الين ماارجع 5 المساء
يخف الشدو الي حاطته في حواجبي , يعني احس كأني ماحطيت شي يثب الحواجب
كمانا لو كترتي منها تسير حواجبك قاسيه وتحسي انه شعر حواجبك يابس
مازلت استخدمها عشان اخلصها وكمان بعد مااستخدمها امسح الفرشه من اثر الشدو
سعرها 20 ريال من سنتربوينت
ماراح ارجع اشتريها تاني لانه ماحبيتها كتير
روج من ريفلون
اخدته عشان لونه فاقع وحلو للصيف , مات مافي اي ترطيب ولا لمعه
لكن مات ماينشف الشفايف ابدن فدا الشي حبيته فيه
لمن تحطيه ع الشفايف تكون ريحته فيكس وبعدها يديكي لسعه خفيفه
بعد خمس دقايق تحسيه انه خفت اللسعه اشويه وينشف ع الشفايف
ثباته ممتاز يعني اكل واشرب الاحظ انه خف اشويه شي بسيط
حرجع اشتري منه كذا لون لانه تركيبته عجبتني واللون يطلع حلو ع الشفايف وحتى مايحتااج لي محدد شفايف
سعره 51 من سنتربوينت
منتجات للبشره
واقي الشمس من نيتروجينا
نسبه الحمايه 50% ودي النسبه الي تحتاجها بشرتي لانها حساسه
مو ترطيب اكتر من انه واقي الشمس , يعني لازم ترطبي بشرتك قبل استخدامه
تحسي بشويه حرقان لمن تستخدميه (للبشرات الحساسه) لكن للبشرات العاديه لاء
لمن تكثري منها مايخلي البشره بيضاء , عكس باقي انواع واقي الشمس
يناسب كل الوان البشره لانه لمن ينحط ع الوجه كانك تستخدمي كريم عادي
سعره 55 ريال من الصيدليه , ماراح ارجع اشتريه تاني لانه ابغا اجرب انواع تانيه
كريم مرطب للجسم من هاملايا
ترطيبه جميييل للصيف وخفيف ع البشره وريحته حلوه وتخف ع طول
احوب استخدمه قبل النوم لاني مااحوب انام وفي يدي كريمات ثقيله
يفتح لون البشره لاء , حسيت انه بس كترطيب مو اكثر
ويناسب البنات الي يحبوا الترطيب الخفيف
سعره اظن 10 ريال من السوبرماركت
ممكن ارجع اشتري منه
منتجين استخدمهم كل يوم الصباح للشاور
شاور جل ديتول
ينظف الجسم لكن مايجفف البشره ويعطي انتعاش بالزات لمن ارجع من الدوام مع الحر
واحيانا استخدمه بعد سكراب القهوه لانه ينظف اثار السكراب من الجسم
حبيته دي الفتره وحرجع اشتريه وسعره18 ريال
بلسم للجسم من نيفيا
له طريقتين بالاستخدام اما تحطيه ع جسمك وتخليه دقيقتن تلاته وتشطفي
او تحطيه ع جسمك وتدلكي وتاخدي وقتك وبعدها تشطفي
انا الصباح عشان الدوام اسوي الطريقه الاولي , عشان بعدها ارطب جسمي بمرطب خفيف وسريع سريع
ولمن اكون في البيت استخدم الطريقه الثانيه عشان بعدها يكون في وقت وارطب جسمي بزيت وكريم ترطيب
مو مرا يرطب لكن يسهل عليكي توزيع الكريم في الجسم لانه يديكي ترطيب بسيط جدن
ريحته مو ثابته للجسم , ممكن تستغني عن المرطب بعده انا بالنسبه لي لاء لازم مرطب بعده
حرجع اشتريه ممكن بس بجرب الانواع التانيه وسعره 10 ريال اخدته بالخصم من السوبر ماركت
للشعر
زيت للشعر من فاتيكا (باللوز)
نوع شعري كيرلي ناعم فروه الراس دهنيه واطراف الشعر جافه
قبل فتره كان شعري جاف بزياده واطراف الشعر متقصفه
وكان يبين بالتسريحات مرا كان تعبان شعري واول شي سويته قصيت الاطراف عشان اشيل التقصف, استخدمته قبل الشاور وخليه ساعه ع شعري
لاني مااحوب الزيت يظل فتره طويله , من اول مرا لاحظت انه خف الجفاف واستمريت عليه
شهري مايو كامل وفعلن الجفاف راح من شعري والتقصف كمان راح
رطب شعري وبنفس الوقت عالجه , ريحته مو مزعجه ابدن وتقيل يعني لازم تستخدميه بحرص
طريقتي اني احطه ع يدي وابدء افرك الفروه بطريقه ناعمه واعمل مساج خفيف واحط كمان ع اطراف الشعر
وارفعه واخليه ساعه وبعدها اغسل شعري مرتين بالشامبو وبعدها احط ماسك فاتيكا بالثوم واخليه 3 دقايق واغسله
تكون المويه لابارد ولا حاره وسط , ويفضل تكون مايله اشويه للبروده عشان ماتفتح مسامات الشعر
رائي فيه جممميل وحبيته لانه فادني كتيررر وتكلمت من قبل عن الي بالصبار لكن دا عالج شعري اكتر
حرجع اشتريه وكمان حجرب الي بالجوز الهند وسعره 13 ريال من السوبر ماركت
دي منتجات جربتها دا الشهر ورائي فيها
دمتم بوود
